"ـ ليش مكلفة حالِكْ جارتنا، والله ما كان بده كل هالعذاب، قولي لي كنت جيت ساعدتك بالطبخ، الله يسامحك، الجار قبل الدار، همممم شي طيب هاليالنجي جارتنا بيمزع ضبانات العقل، ما قلتي لي على اعتبارك جارتنا خبيرة لغات ليش اسمه يالنجي؟!..
ـ شوفي يا جارتنا طالما أنك سألتِ فاليالنجي متل ما بتعرفي ورق عنب محشي بالرز والبقدونس والفليفلة والبندورة وأشياء أخرى مثل البهارات ودبس الرمان وكل شي من عدا اللحمة مشان هيك سموه يالنجي.. واليالنجي بالتركي يا حبيبتي يعني الكذاب.. وهذا يعني أنو هو يبرق كذاب.
ـ يلعن قطاطِك شو بتفهمي باللغات وبالفتَّات .. دخلِك وهاد اليبرق شو وضعه.. يبرق وإلا يالنجي ؟!
ـ لأ هادا يبرق حبيبتي .. هادا بقى بيجي على رز ولحمة وتحته عضام تقبري عضامي أو شرحات بتتنهنه نهنهة تحت اليبرق ومع شوية حوامض .. دوقي شوي من هالصوس.. هممممممممممم.
ـ واللاهي شي طيب، همممم صوس بيفلج..بيطير ضبانات العقل.. ودخلك هالسلطة شو ؟!
سلطه هليون مع الذرة .. هي بتفيد الدماغ كتير وبتعوض عن الفوسفور في الاسم المفرد.
ـ أتاريكِ شاطرة بالعربي والإعراب كمان.. مو بس ضليعة باللغات.. يلعن قطاطِكْ..
ـ شو بدنا نعمل نذرنا نفسنا للعلم منذ الصغر كالنقش في الحجر.
ـ آي.. العمى .. كأنو فيها حجرة هالمجدرة.. شو مانك منقية العدس؟!
ـ لأ تقبريني هي مو حجرة.. هي عدسة ما استوت .. بس ترى ألها فوائد كتير.. بتقوي الأسنان..و السن اللي ما بتكسره بتقويه..
ـ يلعن قطاطِك شو بتفهمي.. حتى بطب الأسنان بتعرفي.. دخلِك شوفي لي هالضرس شو مشكلته ما عم أقدر آكل عليه..
ـ اسمحي لي هلأ ماني فاضية للضرس تبعك عندي معازيم ليوم المعازيم.
ـ دخلِكْ ومن وين هدول المعازيم؟!
ـ مشكَّل ملوَّن .. من كل البلاد.
ـ قصدِكْ شرَوي غرَوي!!
ـ لأ .. هدول مشكل ملون.. بس كنت نازلة عالسوق قام طلع بوجهي كم واحد ووحدة من بلدياتي فخجلت وعزمتهم.. هدول هنن الشروي الغروي.. يعني كلمة وبتنقال(تفضل تغدى عنا) حاكم كل العالم دريانة أنو عندي عزيمة. إن شاء الله ما يجوا يا رب.
ـ والله طبخاتك بيفلجوا.. ما قلتي لي مين ساعدك فيهم؟!
ـ والله ما حدا.. بس الشوفير.
ـ شوفيرك بيفهم بالطبخ كمان؟!!!!!
ـ لأ.. شو فهّمه بالطبخ...
ـ له كان كيف ساعدك؟!
ـ هو اللي راح جابهم من المطعم....إي من المطعم شو صارلك انبهتي!!.. شو مجنونة أنا أشتغل كل هالشغل والمطاعم بجنبي على قفا مين يشيل؟!..آه !!."
ليست هناك تعليقات:
إرسال تعليق