بحر النجوم وعصر الظلمات

"كلما شاهدتُ ذلك الإعلان الذي يعلن عن بحر النجوم أغرق فيه، ليس بسبب عمقه، ولا بسبب علو أمواجه، وإنما بسبب عدم تعرفي على النجوم الذين تزين صورهم الإعلان، باستثناء هيفا، فلقد عرفتها والرماح نواهل مني، عرفتها لأن الغرب اعتبرها نموذجاً للمرأة العربية الحديثة ضمن إحدى الدراسات الجادة، عرفتها لأن كل أولي الأمر العرب يعرفونها، عرفتها لأنها طيَّرت الغضنفر من منصبه بإشارة من إظفرها الذي لمع كبارق ثغرك المتبسمِ،

عرفتها لأنو ما في حدا ما بيعرفها، عرفتها لأنو حتى الأولاد بيعرفوها وبيقلدوها ومثل أعلى لألهن بيحطوها، عرفتها وقلتُ في نفسي إنك والله مقصر يا ابن الحلال ليش ما عرفت باقي النجوم اللي ببحر النجوم، ولكن نفسي قالت لي أنو ما في داعي تعرفهم، لأنهم نجوم غصباً عن راسك، وغصباً عن أساسك المكون من أم كلثوم وفريد وحليم وفيروز وعاصي وزياد ومحمد عبد الكريم وكروان ونور الهدى وغيرهم وغيرهم من سيد درويش اللي بيطلع درويش قدام هالنجوم، مروراً بمحمد محسن وانتهاء بمحمد عبد الوهاب، وتحسرتُ في قلبي على زمن مضى وقلتُ بما معناه أنو اسق الله أيامك يا عصمت رشيد، اسق الله لما كنت تدق عالخشب للمنتخب بين الشوطين وبعد ما تخلص المباراة، اسق الله أيامك يا سمير سمرة وأيام كلمات أغانيك المؤثرة من حبيبي شكله حلو إلى برجه برج الدلو، وبعد أن قلنا اسق الله، سقانا طويلو الأعمار بحر النجوم المالح والمر بآن معاً وبالزور، لا لسبب، فقط لأنو طويل العمر عجبه شكل المطرب، وعجبته إمكانيات المطربة، وعلى ذكر الإمكانيات، فالإمكانيات داخلية وليست خارجية كما تتصور، يعني من جوَّا جوَّا، تحت الشيَّال والحمَّالة، فأوعا تظلموا أصحاب الذوق الرفيع الذين يقدمون لنا هؤلاء النجوم، وعلى اعتبار أن النجوم في بحر النجوم يسبحن ويسبحون، فإن الشوفة أهم من السمعة، واللي بتشوفه غير اللي بتسمعه، لذلك صار بوط المطرب أهم من صوته، وصار الحلمات أهم من الكلمات، والحلمات جمع حلم مشان ما يروح مخكم لبعيد يا ملاعين، وصار اللحم أهم من اللحن، بس ضلت الآهات موجودة، بس غير آهات، وغير هتافات، وصار الغبي يحكي عالشاشات، وصار يوقِّع أوتوغرافات، وصارت القطقوطة تحكي بالفكر، وصاروا أولاد القطقوطة يأخرجوا الفيديو كليبات، وصار كل شي يلبق لأبو بريص، وصارت الضفادع تغني، وصار أبو جنِّيب يطلع على شط البحر دوريات، وأبو جنِّب بالديري يعني سرطان الماء العذب، وبحر النجوم عذب حتى لو كان مر ومالح، بس كلو في حبك يا طويل العمر يهون، بس ما حدا عليك بيمون غير اللي عم يسبح ببحر النجوم، وقلنا بنحكي عسى ولعل، وقلنا بنبكي عسى ولعلَّ، وقلنا بننام، بس ما عم يجينا نوم، قام فتحنا هالتلفزيون، وغرقنا في بحر النجوم!! يا للظلام الذي نعيش فيه، يالبحر الظلمات الذي نتخبط فيه والذي يسمونه عيني عينك وعلى عينك يا تاجر ببحر النجوم !!."