"رح يخلص الأولمبياد الصيني ولسه ما عرفنا شي من أخبار بعثتنا إلى هناك، وهي مكونة حسب معلوماتنا التي حصلنا عليها من قرنة كتير منزوية في جريدة رياضية وبدون صور وكأنها إعلان مبوب، لكن أحداً لم يبوِّب أحوال هذه البعثة، وسمعنا بشي ستين سبعين دولة وما سمعنا باسم بعثتنا الحبيبة، برافو عليهم، يعني كانوا مؤدبين ومهذبين وبالتالي ما حدا جاب سيرتهم لا بخير ولا بشرّ،
وبيستحقوا والله ننتظرهم بالمطار ونرش عليهم رز ونتوجهم بأكاليل الغار، يعني الجماعة بيّضوا الوش، وإذا عرفنا أنو في بالبعثة اللي عددها تسطعشر نسمة سبع لاعبين، فسيكون السؤال المهم هو: شو أخبارهم؟!..
ـ أخبارهم!!.. مناح .. كويسين الحمد لله.. ما صار معهم ولا مشكلة.. ولا إصابة.. ولا حتى حالة وجع راس.. لأ الحمد لله .. كل شي تمام.
ـ أنت ما عم تفهم علي يا ابن الحلال.. عم أسألك إذا فازوا بشي كم ميدالية.. شو بدي بصحتهم ومزاجهم ما أنا عم أسألك عن أخبار الأبطال؟!..
ـ ها.. الأبطال.. إيوه.. بس أنت حبيبي ما سألتني عن الميداليات.. أنت سألتني عن أخبارهم.
ـ العمى شو بتلعي القلب أنت.. يعني ضمن أخبارهم في شي ميداليات ذهبية فضية برونزية ؟!...
ـ لأ هي مو موجودة ضمن أخبارهم.. هي موجودة بأخبار ناس تانيين بعتقد أنو ما بيهمك أمرهم.
ـ فهمت عليك.. قيمنا من الميداليات وخلينا نحكي باليوميات.. دخلك من شو مكونين التنعشر نسمة الباقية من عدد بعثتنا؟!
ـ هلأ عالأكيد ما بعرف، بس حدا قاللي أنو في زعيم للبعثة.. وفي تلاتة أعضاء مجلس الزعماء.. وفي دكتور بيعالج اللاعبين ومجلس الزعماء سوا.. على اعتبار أنو كل أعضاء هالمجلس الإداري ختايرى ومعهم هديك الأمراض البايخة تبع الضغط والسكري والديسك والميسك وهلم جراً.. وفي صحفي مشان يسجل شو صار مع أعضاء البعثة من أخبار.. بس الحمد لله ما تعذب بنوب.. لأنو ما كان في أخبار.. مشان هيك ما كان متضايق من حدا وما انتقد حدا وقال أنو كل شي تمام...
ـ صفي واحد .. مين هو؟! ليش ما ذكرته؟!.. شي واحد بالواسطة مو هيك.. قرايب شي حدا؟!
ـ لا لا يروح مخك لبعيد.. بس على اعتبار أنو زعماء البعثة كلهم من النوع المتوعك.. وبالتالي ما بيواتيهم الأكل الصيني.. فلقد درسوها وبحثوها وفي بند قانوني حطوها وأخدوا معهم معلم شاورما.
ـ شاورما؟!!!!!
ـ إي شوبك.. هاد معلم الشاورما اللي مو عاجبك جاب معه ميدالية ذهبية
ـ ليش الشاورما داخلة بالألعاب الأولمبية؟!!
ـ لأ مو داخلة.. بس أعضاء وفدنا رفعوا كتاب للمجلس الأولمبي الأعلى مشان يدخلوها.. وبس يدخلوها رح نفوز بكل ذهبياتها.. ذهبية سقسقة الصندويشة وحرقها بالسيخ... وذهبية أسرع تركيب للسيخ وهو ني.. وذهبية قص المستوي بأسرع وقت.. وذهبية الشاورما الحرة.. يعني العربي.
ـ لأ يا سيدي ما حزرت... رح يفوزوا فيها الأتراك."
ليست هناك تعليقات:
إرسال تعليق