الموبايل من جديد

"لاشكَّ في أنَّ مشاكل الموبايل السوري أضحت شهيرة أكثر من شهيرة زوجة محمود ياسين أيام زمان عندما كانت الشامة اللي على خدها نقطة علام، وكان أن أخبرني صديقي علام المقيم في الإمارات والحائز على خط سوري لاحق الدفع أنه يدفع فواتيره بانتظام، كما أنه يواظب على دفع الاشتراك الشهري حتى لو كان خارج القطر، ولكنه في الآونة الأخيرة بدأ يلمس أنَّ هناك اشتراكاً جديداً يدفعه كلما تمتَّع بخدمة الحكي على الموبايل لأكثر من اللزوم، مع أنه ليس مثلي من المتأخرين على دفع الفواتير، وليس هارباً من الدفع ومتنصِّلاً كما تدلُّ فواتيره الكبيرة التي دفعها طيلة سبع سنوات من شرائه لهذا الخط اللاحق الدفع، فقلنا له يا عزيزي أنت مغترب ولا تعرف بأحوالنا خيراً من شركة الموبايل، فلقد مرَّ على راس هذه الشركة زبونات اللهم عافينا، شي بيحكي وبيحكي لتصير فاتورته خمسة عشر ألفاً، وبعدين بيطيلس عالدفع، وبيروح بيشتري خط مسبق الدفع، وكفى المؤمنين شر القتال، وشي بيتأخر شهرين ليدفع، وشي بيحكي عالرايحة والجاية على الموبايل مع أنو التليفون الأرضي بجنبه، وما بدها غير شوية لحلحة ورفع للسماعة لا أكثر ولا أقل، ولكي يتعلَّم أبناء الشعب آداب التعامل مع الموبايل، فقد اخترعت الشركة فكرة الدفع المسبق للموبايل اللاحق الدفع!!.. طيب يا أخي رح تجنِّني، شلون لاحق الدفع وشلون لازم ندفع قبل بشكل مسبق؟!!.. كيف.. عندك حلول لغوية لهذا التوصيف ولهذا التطبيق؟!! تصوَّر جيت بدي أحكي بالموبايل قام لقيته ما بيحكي.. مانعينه من الاتصال.. اتصلنا بالشركة لأنو مسموح الاتصال فيها فقط، قالوا لي لازم تدفع سلفة سبعة آلاف ليرة مشان تقدر تحكي، قلت لهم يا أخي بس أنا من أسبوع دفعت فاتورتي، وكل شهر بدفع على آخر مليم، وملتزم مئة في المئة بقوانين الشركة، وخاصة دفع الاشتراك الشهري الخاص بالخطوط اللاحقة الدفع، وطالما اسمه لاحق دفع، فإنَّ طلب السلفة بعد أسبوع من دفع الفاتورة كل شهر مجنِّني، لأ والأنكى من ذلك أنَّ طلب السلفة هذا يشعرني بأنَّ الشركة لا تثق فيَّ، وأنها تعتبرني هارباً لا محالة من دفع الفاتورة بعد طق الحنك مع الأحباب والأصحاب، فهل من جواب؟!!

قلتُ يمكن الجماعة بدهم يخلوك تفكر قبل ما تحكي، لأنو الحكي على الموبايل خراب ديار بخراب ديار، بعدين إذا دفعت السلفة بتخف عليك الفاتورة آخر الشهر، يعني الجماعة عم يقسطوا لك المبلغ تقسيط بدون ما تدرى، لكن صاحبي قال أنو هو بزنس مان، وأنو المصاري اللي بجيبته خير من عشرة في شركة الموبايل، وأنَّ الخط لاحق الدفع وله بهذا الخصوص رسم اشتراك، فإذا أرادوا أن يطالبوا المواطن بسلفة مسبقة الدفع فعليهم إلغاء الخطوط اللاحقة الدفع وجعل كل الخطوط مسبقة الدفع، فإذا دفعنا كاش ستخف مكالماتنا، بينما بالدين فهات رطلين، ويا هلا.. وأهلين!!"